അൽ ഖോർ, ഖത്തർ: അൽ ഖോറിലെ ഇന്ത്യൻ സമൂഹത്തിന്റെ പതിറ്റാണ്ടുകളായുള്ള ഒരു ഇന്ത്യൻ സ്‌കൂൾ എന്ന സ്വപ്നം സാക്ഷാത്കരിച്ച് കാർഡിഫ് ഇന്ത്യൻ സ്‌കൂൾ പ്രവർത്തനം ആരംഭിച്ചു. അന്താരാഷ്ട്ര നിലവാരത്തിലുള്ള അടിസ്ഥാന സൗകര്യങ്ങളോടെ ആരംഭിച്ച സ്‌കൂളിൽ കിന്റർഗാർട്ടൻ മുതൽ 12-ാം ക്ലാസ് വരെ സിബിഎസ്ഇ (CBSE) പാഠ്യപദ്ധതിയിൽ പഠനസൗകര്യം ഒരുക്കിയിട്ടുണ്ട്.

ചെയർമാൻ ഡോ. ഹമദ് അൽ കാബിയുടെയും പ്രിൻസിപ്പൽ ഡോ. മനീഷ് മംഗളിന്റെയും നേതൃത്വത്തിലാണ് കാർഡിഫ് ഇന്ത്യൻ സ്‌കൂൾ സ്ഥാപിച്ചത്. ഒരു അക്കാദമിക് സ്ഥാപനമെന്നതിലുപരി, അറിവ്, നവീകരണം, മൂല്യങ്ങൾ, സർഗാത്മകത, നേതൃത്വം, പ്രായോഗിക കഴിവുകൾ എന്നിവയ്ക്ക് ഒരുപോലെ പ്രാധാന്യം നൽകി വിദ്യാർത്ഥികളുടെ സമഗ്ര വളർച്ച ഉറപ്പാക്കുന്നതിനാണ് സ്‌കൂൾ ലക്ഷ്യമിടുന്നത്.

ഖത്തറിൽ ഡോ. ഹമദ് അൽ കാബിയുടെ നേതൃത്വത്തിലുള്ള മൂന്നാമത്തെ വിദ്യാഭ്യാസ സംരംഭമാണ് കാർഡിഫ് ഇന്ത്യൻ സ്‌കൂൾ. ബ്രിട്ടീഷ് കരിക്കുലം പിന്തുടരുന്ന കാർഡിഫ് ഇന്റർനാഷണൽ സ്‌കൂളും ഒരു പ്രത്യേക കിന്റർഗാർട്ടൻ സ്ഥാപനവും അദ്ദേഹത്തിന്റെ നേതൃത്വത്തിൽ നിലവിലുണ്ട്. അൽ ഖോറിലെയും പരിസര പ്രദേശങ്ങളിലെയും ഇന്ത്യൻ കുടുംബങ്ങളുടെ ദീർഘകാലമായുള്ള ആവശ്യമാണ് പുതിയ സ്‌കൂളിലൂടെ പരിഹരിക്കാൻ ലക്ഷ്യമിടുന്നത്. കുടുംബങ്ങൾക്ക് വീടിനടുത്ത് ഗുണമേന്മയുള്ള സിബിഎസ്ഇ വിദ്യാഭ്യാസം ലഭ്യമാക്കുക എന്നതാണ് സ്‌കൂളിന്റെ പ്രധാന ലക്ഷ്യം.

“അൽ ഖോറിലെ ഇന്ത്യൻ സമൂഹം പതിറ്റാണ്ടുകളായി ഒരു ഇന്ത്യൻ സ്‌കൂളിനായി കാത്തിരിക്കുകയായിരുന്നു. ദീർഘകാലമായി നിലനിന്നിരുന്ന ഈ ആവശ്യം നിറവേറ്റുന്നതിനും കുടുംബങ്ങളുടെ പ്രതീക്ഷകളും അഭിലാഷങ്ങളും പ്രതിഫലിപ്പിക്കുന്ന ഒരു സ്‌കൂൾ ഒരുക്കുന്നതിനുമാണ് കാർഡിഫ് ഇന്ത്യൻ സ്‌കൂൾ സ്ഥാപിച്ചത്,” ചെയർമാൻ ഡോ. ഹമദ് അൽ കാബി പറഞ്ഞു.

വിദ്യാർത്ഥികളുടെ അക്കാദമിക്, കായിക, സർഗാത്മക, സാങ്കേതിക കഴിവുകൾ വികസിപ്പിക്കുന്നതിനായി വിപുലമായ സൗകര്യങ്ങളാണ് സ്‌‌കൂളിൽ ഒരുക്കിയിരിക്കുന്നത്. സയൻസ് ലബോറട്ടറികൾ, റോബോട്ടിക്സ്, കമ്പ്യൂട്ടർ ലാബുകൾ, ജ്യോതിശാസ്ത്ര (Astronomy) സൗകര്യങ്ങൾ, ലൈബ്രറികൾ, കല, സംഗീതം, നൃത്തം എന്നിവയ്ക്കുള്ള പ്രത്യേക ഇടങ്ങൾ എന്നിവ ഇതിൽ ഉൾപ്പെടുന്നു. കൂടാതെ നീന്തൽക്കുളം, മൾട്ടിപർപ്പസ് ഓഡിറ്റോറിയം, ഇൻഡോർ കളിസ്ഥലങ്ങൾ തുടങ്ങിയ സൗകര്യങ്ങളും സ്‌കൂളിലുണ്ട്.

അക്കാദമിക് പഠനത്തിന് പുറമെ കായികം, കല, സാങ്കേതികവിദ്യ, പ്രായോഗിക പഠനം, വിവിധ ക്ലബ്ബുകൾ, സാംസ്കാരിക പ്രവർത്തനങ്ങൾ, അനുഭവാധിഷ്ഠിത പരിപാടികൾ എന്നിവയിലൂടെ വിമർശനാത്മക ചിന്ത, ആശയവിനിമയം, പ്രശ്‌നപരിഹാരം, നേതൃത്വശേഷി തുടങ്ങിയ കഴിവുകൾ വളർത്തുന്നതിനുള്ള അവസരങ്ങളും വിദ്യാർത്ഥികൾക്ക് ലഭിക്കും.

 “ഇന്നത്തെ വിദ്യാഭ്യാസം കുട്ടികളെ പരീക്ഷകൾക്ക് മാത്രമല്ല, അതിവേഗം മാറിക്കൊണ്ടിരിക്കുന്ന ലോകത്തിനും സജ്ജരാക്കേണ്ടതാണ്. ഖത്തറിനും ആഗോള സമൂഹത്തിനും അർത്ഥവത്തായ സംഭാവനകൾ നൽകാൻ കഴിയുന്ന ആത്മവിശ്വാസമുള്ള, സാഹചര്യങ്ങളോട് പൊരുത്തപ്പെടുന്ന, ഉത്തരവാദിത്തമുള്ള, ആജീവനാന്ത പഠിതാക്കളെ വളർത്തിയെടുക്കുകയാണ് ഞങ്ങളുടെ ലക്ഷ്യം.” പ്രിൻസിപ്പൽ ഡോ. മനീഷ് മംഗൾ പറഞ്ഞു:

കാർഡിഫ് ഇന്ത്യൻ സ്‌കൂളിന്റെ പ്രവർത്തനാരംഭം അൽ ഖോറിലെ ഇന്ത്യൻ സമൂഹത്തിന് ഒരു പ്രധാന നാഴികക്കല്ലാണ്. സിബിഎസ്ഇ കരിക്കുലം, ആധുനിക അടിസ്ഥാന സൗകര്യങ്ങൾ, വിദ്യാർത്ഥികളുടെ സമഗ്ര വികസനത്തിന് നൽകുന്ന പ്രാധാന്യം എന്നിവയിലൂടെ അക്കാദമിക് മികവിനൊപ്പം വ്യക്തിത്വ വികസനത്തിനും ആവശ്യമായ അന്തരീക്ഷം ഒരുക്കുകയാണ് സ്‌കൂൾ ലക്ഷ്യമിടുന്നത്.

അൽ ഖോറിൽ ഒരു ഇന്ത്യൻ സ്‌കൂൾ സ്ഥാപിക്കണമെന്ന ദീർഘകാലമായുള്ള സ്വപ്നം യാഥാർത്ഥ്യമാക്കുന്നതിന് നൽകിയ പിന്തുണയ്ക്കും മാർഗനിർദേശത്തിനും പ്രോത്സാഹനത്തിനും ഖത്തർ വിദ്യാഭ്യാസ-ഉന്നത വിദ്യാഭ്യാസ മന്ത്രാലയത്തിനും ഖത്തറിലെ ഇന്ത്യൻ എംബസിക്കും സ്‌കൂൾ മാനേജ്മെന്റ് ആത്മാർത്ഥമായ നന്ദി അറിയിച്ചു.